Свети Симеон Метафраст
Свети Симеон Метафраст (Логотет, или Преведувач) бил византиски државник, црковен писател, историчар и агиограф, една од најенигматичните фигури на византиската историја и литература. Неговиот спомен се празнува на 22 ноември (9 ноември ст.ст.).
Кратко житие
Св. Симеон се родил во Константинопол во имотно и благочестиво семејство, и се стекнал со добро световно и духовно образование. Живеел чисто и непорочно како вистински аскет, и се одликувал со голема храброст и мудрост. Поради тоа уживал голема чест кај царот Лав Мудриот; еднаш бил испратен на Крит за да преговара за мир со Арапите, кои во тоа време го завзеле островот. По успешното завршување на мисијата, тој се вратил во Цариград, се повлекол од светот и станал монах.
Пишувал житија на светители, и составил нови 122 житија, а поправил 539 веќе постоечки животописи. Се упокоил во 960 година. Од неговот тело истекло благоухано и целебно миро.
Дела
Свети Симеон најмногу се прославил со црковно-историските трудови: собирал мноштво стари текстови и усни преданија за животот, подвигот и страданијата на светителите. Сето тоа го преработил, ги издвоил поважните од помалку важните делови, и ги заменил архаизмите со нови, разбирливи зборови. Воден од верата дека житијата се резултат на човечкиот подвиг и благодатта Божја, тој ги прераскажал и уредил сите собрани житија, давајќи им верно историско светло и уцврстувајќи го во нив вистинскиот дух. Кон житијата тој додал и пофални и поучни слова за Господовите и Богородичните, како и некои други празници, извадоци од дела на Светите Отци Учители на Црквата. Подредени по денови и месеци, житијата биле издадени во Менологион или Календар на светите, кој станал основа на византиската агиографија, послужил за обединување на богослужбите и е неразделен дел од православната богословска култура.
Поради овој труд свети Симеон бил наречен Метафраст (на грчки „прераскажувач, преведувач“). Со доза на сомнеж, свети Симеон се смета за автор и на Хрониките, на канонските зборници, историја на светот, писма, поеми и др.
